Yon Seminè Fòmasyon pou plizyè korespondan Lavwadlamerik ann Ayiti kòmanse jounen lendi 9 oktèb lal. Jounalis korespondan Lavwadlamerik ki konn fè repòtaj sou videyo yo ap patisipe nan yon seminè fòmasyon pou konnen kòman yo kapab itilize dènye teknoji nan mond la pou fè pi bon repòtaj.
Chèf Sèvis Kreyòl VOA a, Ronald Cesar, akonpaye ak 3 lòt espesyalis nan Lavwadlamerik, Sandra Lemaire ak Jean Michel Mathurin ki pale kreyòl ak Joan Mower yon lòt responsan VOA, se moun kap fè fòmasyon an.
Chargée D'Affaires ameriken an pou peyi Dayiti, Diplomat Robin Diallo, te pale ak repòtè yo kote li mete aksan sou enpòtans laverite dwe jwe nan travay jounalis la. Diplomat la ki gen anpil eksperyans nan domèn kominikasyon piblik di repòtè yo, laverite nan metye jounalis la se responsabilite yo, e fòmasyon sa a pral pèmèt yo idantifye fo enfòmasyon, fè disparèt rimè epi fè soti laverite.