Premye minis ayisyen an, Jean Henry Céant, ak manm gouvènmanl li fè yon rankont travay ak yon delegasyon Inyon Ewopeyèn sou dekesman plizyè fon pou Ayiti.
Premye Minis ayisyen an Jean Henry Céant ak mesye Stephano Manservisi responsab CED nan komisyon Inyon Ewopeyèn nan. (Foto Twitter, Primature, Ayiti.)
Delegasyon Inyon Ewopeyèn nan te gen nan tèt li, Mesye Stephano Manservisi, direktè jeneral Kowoperasyon Entènasyonal ak Devlopman, CED, nan komisyon Inyon Ewopeyèn nan. Rankont sa dewoule nan sware 22 novanm 2018 la.
Aprè chita pale a, Premye Céant anonse ke Inyon Ewopeyèn fè Ayiti yon don 100 milyon ewo kòm apui bidjetè peyi a. Nan sans sa a Ayiti deja resevwa 30 milyon ewo depi mwa jiyè pase a.
35 milyon ewo ap debloke nan lane 2019, e 35 milyon ewo nan lane 2020 pou konbat kòripsyon, kontrebann ak envazyon fiskal. Inyon Ewopeyèn antann bay Ayiti 37 milyon ewo adisyonèl pou ranfòse kolektivite tèritoryal yo.
Korespondan Lavwadlamerik: Renan Toussaint ak Matiado Vilmé, kontribye atik sa a.