Dènye bilan ki soti nan biwo Pwoteksyon Sivil nan mitan jounen an di goudougoudou a lakoz 12 moun mouri: 8 nan Pòdepè; youn nan St-Louis du nord; 3 nan Gro Mòn. Daprè bilan Pwoteksyon Sivil la, gen 188 moun ki blese.
Enjenyè Gérard Métayer ki responsab yon pwogram Tsunami di Lavwadlamerik yo pa atann yo ak yon Tsunami ann Ayiti, etan done magnitude goudougoudou a pat rive nan 6.5. Li te sèlman rive nan 5.9. Li di si tap gen Tsunami sa tap gentan fèt avan 1 èdtan aprè tranbleman an. Msye Métayer se vis prezidan sistèm alèt Tsunami nan Caraibes la ak zòn ki tou prè l yo.
Prezidan Jovenel Moïse nan tèt yon delegasyon ki gen ladan Premye minis Jean Henry Céant ak plizyè lòt minis nouvo gouvènman an vizite depatman nòdwès apre yon trablemandtè 5.9 te frape yo.
Gouvènman Etazini an prezante senpati ak soutyen li bay tout moun Ann Ayiti goudougoudou 6 oktòb la afekte. Daprè nòt Anbasad amerikèn nan, Etazini pare pou l patisipe nan efò sekou yo, si yo mande l fè sa.