Ozetazini, Sant Nasyonal Siklòn Ameriken an, ki baze nan Miami, nan Eta Florid, fè konnen zye Siklòn Florans touche tè nan Eta Kawolin di Sid byen bonè vandredi 14 septanm 2018 la. Li pote avèk li van kap soufle o maksimòm a 150 kilomèt a lè.
Dapre otorite nan administrasyon Trump la, sant siklòn nan rive sou rivaj la tou pre vil Wrightsville Beach, pa lontan aprè 7tè di maten. Espesyalis meteo yo degrade siklòn nan ki desann nan nivo kategori 1; men yo ensiste pou yo di se yon movetan ki gen kapasite toujou pou l fè anpil dega ak domaj nan zòn ki sou pasaj li yo. .
Sekouris, ki te sòti New York, sove yon nèg ki t ap neye nan inondasyon Siklòn Florance pwovoke nan vil River Bend, Kawolin di Nò, Ozetazini, vandredi 14 septanm 2018 la.
Responsab yo nan Sant Nasyonal Siklòn ameriken an deklare Florans deja kreye yon sitiyasyon ki kapab frape kèk gwo kou, paske van-tanpèt ak inondasyon l ap koze kapab pran lavi anpil moun akoz gwo bouras van l ap pote sou kòt Eta Kawolin di Nò.
Gouvènè Eta Kawoloin di Nò a, Roy Cooper, lanse avètisman pou l di se yon siklòn ki ka akoze gwo dega e menm kreye yon sitiyasyon katastwofik anpil kote. Dapre yon rapò otorite yo fè sikile, deja genyen 700 mil moun ki pa gen kouran elektrik lakay yo nan Kowolin di No ak Kawolin di Sid.