Ayiti

Eks-Premyè Dam Martine Moise Reponn Kesyon Lajistis Sou Asasina Mari Li

  • Ekip Sèvis Kreyòl VOA

Martine Moise (mitan), madanm defen Prezidan Jovenel Moise, rive nan tribinal pou l reponn kesyon jij la sou dosye asasina mari li, 6 Okt. 2021.

See comments

WASHINGTON D.C. — 

Ansyen premyè dam Ayiti a, Martine Moise, reponn kesyon la jistis jedi 7 oktòb la sou asasina mari li, Prezidan Jovenel Moise.

Prezidan an te mouri anba bal asasen anvan solèy te leve 7 jiyè pase a. Madan Moise, li menm, te blese nan okazyon an e li te pran avyon tou suit pou l t ale Miami, Eta Florid, kote l te resevwa swen.

Anvan li te reponn kesyon jij Pake Premyè Enstans Pòtoprens la, Madan Moise te pale ak VOA Kreyòl pou l di:

"Mwen vin la a jodi a pou m kapab reponn kesyon jIj la, pou ke ankèt Prezidan Jovenel Moise la avanse. Mwen vle jIstis. M ap mande l maten, m ap mande l a midi, m ap mande l aswe... jIskaske m jwenn li. M ap envite tout moun, ki gen pou wè de lwen ou de pre avèk dosye a, vin bay depozisyon nou."

Polis Nasyonal Ayiti deja arete plizye douzèn moun nan kad ankèt sou asasina a; pami yo gen kèk Ayisyeno-Ameriken, Kolonbyen ak manm Polis Nasyonal Ayiti a (PNH).