Lagrand Bretay òganize yon seremoni djak sou djak pou akeyi Prezidan ameriken an, Donald Trump, k ap fèt yon vizit deta ofisyèl 2 jou. Sou pwogram vizit sa a genyen yon rankont avèk lafanmi wayal, yon dine deta avek yon chita-tande avèk premye minis britanik la, Thereza May.
Nan moman lidè ameriken an tap kite La Mezon Blanch, li te deklare se yon vwayaj kap "trè zenteresan" e li panse se yon okazyon pou Lèzetazini ak Wayòm Ini jete baz pou sa misye Trump rele: "yon gwo akò komesyal" ke yo va siyen nan lavni.
Vizit sa a vini nan moman La Grand Bretay twouve l nan mitan yon gwo tanpèt politik. Premye Minis Thereza May te anonse mwa pase a li pral bay demisyon li apre li te echwe nan tantativ li tap fè pou l konplete pwosesus retrè La Grand Bretay nan Inyon Ewop la.