Yon moun nan eta Kalifòni nan wès peyi Etazini enfekte ak varyan Omicron COVID-19 la. Se premye moun Etazini idantye ki enfekte ak viris sa a.
Doktè Anthony Fauci deklare moun sa a sot tounen nan peyi a apre li te vizite Afrik di Sid 22 Novanm pase a. Li teste pozitif pou viris la 29 Novanm.
Dapre Doktè Fauci moun sa a vaksinen kont COVID-19, men li poko resevwa vaksen booster (siplemante a).
Nouvèl la vini nan moman savan yo ap eseye etidye risk nouvo varyan viris la poze.
Administrasyon Biden nan te pran mezi mwa pase a kont vwayajè ki soti nan rejyon Afrik Ostral la kote yo te idantifye nouvo varyan sa a pou premye fwa. Depi lè a varyan Omicron an gaye toupatou nan rejyon sa a.
Gen plis pase 2 douzèn lòt peyi etranje ki konfime ka varyan Omicron an lakay yo.