Pandan 4 pitit Rèn Elizabeth II yo te mache an silans dèyè sèkèy li ki te vlope ak drapo wayal Ekòs la, yon gwo foul moun te kanpe sou 2 bò lari a pou wè yo ap mache nan direksyon Katedral St. Giles la.
Se la ke yo te òganize yon mès aksyon de gras kote yo te chante lwanj defen monak la kòm "yon moun ki te fè pati lavi yo pandan plis pase 70 zan."
Foul yo te aliyen nan lari pandan pwosesyon solanèl la, menm jan yo te fè sa dimanch 11 septanm nan, lè sèkèy la, ki te sòti nan Chato Balmoral, te rive nan katedral la.
Wa Chal III te gen inifòm lame li sou li, epi Prensès Anne, Prens Andrew ak Prens Edward te akonpaye l.
Sèkèy la pral rete nan katedral la jiska madi dekwa pou piblik Ekòs la kapab rann rèn nan yon dènyè omaj. Elizabeth II te mouri 8 Septanm pase a; li te gen 96 zan.