Siklòn Dorian te rete kanpe, san deplase, sou Zile Grann Bahama pandan 36 zèdtan, sòti dimanch premye septanm pou rive lendi 2 septanm 2019 la, kote li te vide frap avèk van ki t ap soufle ak fòs yon siklòn kategori 4. Daprè otorite yo, genyen 5 moun pou pi piti ki mouri sou yon ti zile ki rele Abaco, toujou nan Bahamas. Popilasyon an toujou gen konsèy pou yo rete anndan kay yo menmsi sanble siklòn nan pa gen lontan ankò pou l pase sou zile yo.
Imaj televizyon montre tout gwo dega siklòn nan fè nan Bahamas gras ak yon repotè chèn televizyon ABC ak yon ekip ki te rive lokalize 4 moun ki te an difikilte; yo te ba yo konsèy pou yo mache, al jwenn yo dekwa pou yo te ka al pran abri nan yon azil ki te sitiye pa lòt bò sile a, kote gwo fòs siklòn nan potko rive.
Sekouris ki t ap mennen manm yon fanmi nan yon zòn sekirite nan moman Siklòn Dorian te kontinye pote lapli ak van sou vil Freeport, nan Bahamas, madi 3 septanm 2019 la.
Espesyalis yo prevwa Dorian pral rete yon siklòn kategori 4 pandan l ap deplase nan direksyon pati lès Eta Florid nan fen jounen madi a epi Eta Jòji ak Kowolin di Sid mèkredi ak jedi. Plizyè milyon moun k ap viv nan Eta Florid ak Kawolin di Sid resevwa lòd pou yo deplase al rete lòt kote pwovizwaman. Kant-a-pou Kawolin di Nò, eta sa a anba yon eta dijans nan moman espesyalis yo prevwa Dorian pral touche tè la-ba a byen bonè mèkredi.
Marie-Luce ap pote detay nan repòtaj televize sa a.