Ozetazini, nan momna rete kèk jou sèlman pou eleksyon primè dewoule nan 6 eta, sondaj yo montre kous la ap vin pi sere nan eta sa yo ant 2 kandida a la prezidans demokrat yo: ansyen Sekretè Deta Hillary Clinton avek Senatè Eta Vermont la, Bernie Sanders.
Kandida a la prezidans yo Ozetazini (sòti agoch ale adwat): Hillary Clinton (Demokrat), Donald Trump (Repibliken) avèk Bernie Sanders (Demokrat).
Nan jounen jedi 2 me 2016 la, Madam Clinton --ki tap mennen kanpay nan Eta Kalifòni-- pwononse yon diskou sou politik entènasyonal kote li te santre atansyon li plis sou eksperyans pèsonèl li. Li fè konnen se tap yon gwo erè istorik si pèp ameriken an ta eli Donald Trump kòm prezidan Lèzetazini.
“Non sèlman ide Donald Trump yo se ide ki diferan ap pa m yo; men se ide ki totalman san konsistans, se ide vire m 2 bò. Mwen pa menm kwè nou ka rele sa "ide": se tou senpleman yon seri deklarasyon gran-panpan, ekstravagan e dwòl; se mezantant pèsonèl ak yon bann manti egzajere.”
Donald Trump pat pèdi tan pou l reyaji. Kandida repibliken an itilize kont Twitter li pou l fè deklarasyon sa a:
“Hillary fè zero nan diskou sa a ki te swadizan santre sou politik etranjè. Se pa menm politik etranje; se "politik" tou senpleman li fè ak diskou sa a. Epi li pat menm sanble li prezidansyab."
Jiskaprezan Madam Clinton ap kontinye batay di pou l jwenn nominasyon pati demokrat la, paske kandida Bernie Sanders ap takle li seryezman.
Yon bon pwen pou kandida repibliken an: Nan jounen jedi 2 me 2016 la, prezidan Chanm Depite a, Paul Ryan, deklare li pral vote pou Donald Trump nan eleksyon novanm 2016 la. Analis yo di se yon fason pou lidè repibliken yo ini yo dèyè kandida kap jwenn nominasyon pati a.