WASHINGTON, DC —
O Brezil, Prezidan Dilma Rousseff, kap fè fas ak gwo difikilte pou l rete sou pouvwa a, anile yon vizit li te genyen pou l fè nan capital federal Lèzetazini an, Washington, kote li ta pral asiste yon somè 2 jou sou sekirite nikleyè kap kòmanse jedi 31 mas 2016 la
Madam Rousseff pran desizyon pou l anile vwayaj la apre pi gwo pati politik nan peyi a ak yon kowalisyon ki tap apiye gouvènman an deside brid sou kou, nan jounen madi a, pou yo kite l tonbe.
Sitiyasyon sa a mete premye fanm ki monte prezidan o Brezil pi prè yon jijman kote palman an kapab wete li sou pouvwa a. Jijman sa a -ki kapab baze sou akizasyon deske Prezidan Roussef mele nan koripsyon, tankou move jesyon lajan Leta a-- kapab dewoule pa pi ta ke mwa pwochen an.