Preske 2 mwa depi Ajans Santral Ranseyman Lèzetazini an (CIA) te lanse yon kanpay relasyon pibik san parèy pou l fè pwomosyon pou youn nan anplwaye Ajans la dekwa pou l vin okipe pòs direktè a, moun ki patwone kanpay sa a pral konnen anvan lontan si l ap mache byen oubyen si li pa p bay bon rezilta. Kandida sa a se Gina Haspel, yon ansyen ajan CIA ki okipe aktyèlman pòs direktè pwovizwa.
Kandida pou pòs Direktè CIA a, Gina Haspel, pandan li te devan Komisyon Sèvis Sekrè Sena a pou seyans depozisyon ki pou debouche sou konfimasyon li.
Nan jounen mèkredi 9 me 2018 la, Madam Haspel prezante devan Komisyon Sèvis Sekrè Sena a pou yon seyans depozisyon ki santre sou wòl li te jwe nan pwogram ajans la te genyen pou l entèwoje ennmi Lezetazini yo te kenbe ak operasyon sekrè. Pa gen anpil moun nan sektè sèvis sekrè a ki bay kesyon sa yo twòp enpòtans; men yo gen kè-sote pou sa pa debouche sou lòt entèwogatwa konsènan aspè pwofesyonèl ak objektif ajans espyonaj ki pi enpòtan nan peyi a.