Depatman Jistis ameriken akize 4 manm lame Peyi Lachin deske yo pirate elektwonikman gwo konpayi kredi ameriken EQUIFAX epi yo vòlè enfòmasyon pèsonèl preske mwateye tout popilasyon amerikèn nan. Korespondan Lavwadlamerik Masood Farivar, ki prepare yon repòtaj sou dosye a, fè konnen se sèlman 2èm fwa Depatamn Jistis la pote yon plent krimikèl kont manm fòs militè chinwaz yo.
Nan kad youn nan pi move pirataj elektwonik ki janm fèt nan listwa, 4 pirat chinwa yo te jwenn mwayen antre sou rezo òdinatè EQUIFAX la nan lane 2017 epi yo te vòlè enfòmasyon pèsonèl plizyè milyon sitwayen ameriken. Yo te rive mete men sou done tankou non, dat de nesans avèk nimewo sekirite sosyal yon afè de 145 milyon ameriken. Se konsa tou nimewo lisans omwen 10 milyon chofè ameriken te tonbe nan men yo avèk nimewo kad de kredi yon afè de 200 mil lòt sitwayen ameriken. 4 militè chinwa yo genyen tou pou yo reponn akizasyon dèske yo vòlè sekrè komèsyal ameriken.
Katye jeneral konpayi Equifax Inc. ki baze nan vil Atlanta, Eta Jòji. Li se prensipal viktim pirataj elektwonik manm lame chinwaz la (Foto: Dosye - REUTERS/Tami Chappell).).
Minis Jistis Lèzetazini an, William Barr, ki t ap abòde dosye a nan jounen lendi 10 fevriye a, fè konnen “dimansyon pirataj elektwonik sa a gen yon pwopòsyon ekstwòdinè” e sa te oblije plizyè milyon ameriken “pran dispozisyon pou yo pwoteje tèt yo kont vòl idantite.” Daprè yon plent ki genyen ladan l 9 chèf d akizasyon depatman an te pote nan tribinal semèn pase a, akize chinwa yo se manm Enstiti Rechèch Lame Liberasyon Popilè Lachin nan. Yo gen pou reponn akizasyon dèske yo te fè konplo pou yo komèt fwod òdinatè, espyonaj ekonomik ak itilizasyon kominikasyon elektwonik pou yo komèt vòl. Puiske akize yo twouve yo andeyò Lèzetazini, li pa sanble li posib pou lapolis amerikèn arete yo.