Yon otorite wo–plase nan domèn lasante a konfime 4 nouvo ka kowonaviris pami sitwayen ameriken responsab yo t al pran sou yon bato kwazyè o Japon epi yo te transpòte yo Ozetazini. Doktè Nancy Messonnier, direktris Sant Kontwòl ak Prevansyon maladi (CDC) ki pale ak jounalis yo nan yon konferans pa telefòn, fè konnen 18 pasaje ki te sòti sou bato Diamond Princess la teste pozitif pou viris la.
Lendi 17 fevriye 2020 an yo te avakye 329 ameriken ki te sou bato a. O kòmansman, apre pasaje sa yo te fin debake, otorite ameriken yo te aprann se 14 nan yo sèlman ki te teste pozitif pou maladi a. Depatman Deta a te deside mete an karantèn ameriken enfekte yo, ke yo te transpòte ansanm avèk kèk lòt pasaje nan 2 avyon charter. Nan konferans-call la ki dewoule vandredi 21 fevriye a, otorite yo diminye enpòtans pawòl ki di kòmkwa moun sa yo te trape viris la pandan yo te sou wout pou yo retounen nan peyi yo.
Ian G. Brownlee, Asistan Sekretè Deta Powovizwa pou Afè Konsilè, di jounalis yo: “Li enpòtan pou moun note ke tès ki montre pasaje yo gen maladi a te fèt ant 48 a 72 zè anvan avyon t al chache yo sou bato a nan Peyi Japon. Alòs, rezilta nou konstate la a pa reprezante enfeksyon ki ta fèt pandan moun yo te sou wout.”
Katye jeneral CDC (Sant Nasyonal Ameriken pou Kontwòl ak Prevansyon Maladi) nan vil Atlanta, Eta Jòji.
Misye Brownlee kore desizyon otorite yo te pran pou yo fè ameriken enfeke yo vwayaje nan menm avyon charter ak lòt pasaje yo; paske li di “moun ki sou teren yo te fè bagay ki kòrèk la lè yo te deside, pa mezi de prekosyon, plase 14 pasaje sa yo an karantèn nan yon zòn kote yo pa t poze okenn menas ni pou tèt yo, ni pou lòt moun.” Jounal Washington Post te rapòte jedi 20 fevriye 2020 an otorite yo nan CDC pa t dakò pou moun sa yo te vwayaje nan menm avyon avèk lòt pasaje yo paske, daprè yo, yo te kapab pwopaje viris la toujou.
Pandan konferans-call vandredi a, Doktè Messonnier deklare: “Desizyon konsa se desizyon ki difisil ke nou dwe pran chak jou... Pral toujou genyen opinyon diferan lè nou reyini pou n pran yon desizyon.” Direktris CDC a ajoute, lè l baze l sou etid epidemyolojik yo, li te atann li aske t ap gen plis moun ki enfekte ak kowonaviris la pami sila yo ki te sòti sou bato Diamond Princess la. Pou l eksplike sa, li fini pa di pasaje yo te twouve yo nan yon espas trè redui e fèmen; konsa kondisyon yo te ranpli pou viris la pwopaje.