Konseye sekirite nasyonal Lèzetazini an, John Bolton, ki t ap reponn kesyon kontribitè Lavwadlamerik Greta Van Susteren, te abòde, antwòt, somè ki pral mete Prezidan Donald Trump anvan lontan fasafas avèk lidè Kore di Nò a, Kim Jong Un. Misye Bolton di li difisil pou yon moun konnen vrè motivasyon gouvènman Pyongyang nan lè li lanse lide pou rankont sa a dewoule.
"Li posib ke se yon jès bòn volonte an pati, menm jan li posib tou -tankou nou deja wè sa nan ka Iran ou byen nan ka Kore di Nò li menm- ebyen, li posib pou 2 pati yo te rankontre difikilte. Konsa yo aksepte fè sa ki nesesè pou yo debloke sitiyasyon an; men mwen espere se yon jès bòn volonte."
Yon revandèz jounal ap konte lajan li devan yon pil jounal ki genyen sou yo foto Prezidan Donald Trump ak lidè Kore di Nò a, Kim Jong Un. (Sengapou, 11 me 2018).
Jiskaprezan sèl pwomès piblik La Mezon Blanch fè se posibilite pou l mete sou pye yon pwogram devlopman ekonomik pou Kore di Nò si Pyongyang aksepte siyen e respekte yon akò nikleyè. Misye Bolton ensiste pou l di Trump ap leve kite rankont la pase pou l aksepte siyen yon akò ki pa chita sou angajman solid.