Sekretè d'Eta Antony Blinken deklare Lèzetazini "pa gen yon strateji pou yon chanjman rejim nan La Risi ou okenn lot kote." Diplomat pi wo plase Ameriken an fè komantè sa a apre Prezidan Joe Biden te deklare Samdi ke Prezidan Ris la Vladimir Putin "paka rete sou pouvwa a."
"Mwen kwè prezidan an, Lamezonblanch, souliyen yè swa ke, an tèm senp, ke nou paka bay Prezidan Putin pouvwa pou'l mennen lagè ni agrese Ikrèn ni nempot ki lot peyi," Blinken deklare Dimanch pandan yon vizit nen Jeruzalèm.
Biden deklare Samdi nan Poloy ke defans l'Oksidan ka sèvi pou Ikrèn kont yon envazyon Ris esansyèl pou pwoteje demokrasi toupatou nan mond lan pou jenerasyon kap vinn apre yo.
"Defi ki prezante kounyela a se yon defi istorik," Biden deklare nan yon diskou li te pwononse nan Chato Wayal Vasovi a, yon batiman istorik ki te detwi pandan Dezyèm Gè Mondyal la e ki te rebati ak dekonb yo nan ane 70 ak 80 yo.
Your browser doesn’t support HTML5
Biden di Vladimir Putin Paka Rete sou Pouvwa a
Biden deklare lagè La Risi ap mennen kont Ikrèn se "yon egzanp youn nan pi ansyen enpils imen ki egziste - setadi sèvi ak lagos ak dezenfomasyon pou satifè dezi pou pouvwa ak kontwol absoli."
"Se yon defi dirèk pou lod entènasyonal la ke nou te tabli nan fen Dezyèm Gè Mondyal la, Biden ajoute.
Kanta pou Putin, Biden deklare "Nan non Bondye, mouche sa a paka rete sou pouvwa a."
Pandanstan, nan Lviv, nan rejyon wès Ikrèn Samdi, gen 5 moun ki mouri nan 2 atak ak obi. Gouvènè Maksym Kozytskyy deklare 2 obi yo frape yon depo petwol e gen 2 lot ki frape yon faktori militè.
Ajans nouvèl Associated Press rapote gen yon gason ke yo arete nan youn nan lye sa yo ke yo sispèk se yon espyon La Risi.