Evajelis Ameriken Billy Graham Mouri - Li Te Genyen 99 Lane

Gran evanjelis kretyen ameriken an Billy Graham --ki te genyen repitasyon kòm predikatè ki te gen plis enfliyans pase tout moun pandan 20èm syèk la-- mouri nan jounen mèkredi 21 fevriye 2018 la. Li te genyen 99 lane.

Pandan plizyè dizèn dane, Reveran Graham te balanse yon Bib sou tèt li pandan li t ap preche nan kwazad ak revèy tou patou nan lemond. Dapre kalkil ki fèt, li te preche devan plis pase 200 milyon moun nan 185 peyi. Li te gen okazyon òganize sa ki te rele "kwazad Billy Graham" devan plizyè dizèn milye moun tandiske plizyè milyon kretyen vivan te swiv mesaj relijye li yo nan televizyon e atravè satelit. Pandan plis pase 70 zan predikasyon, Billy Graham te di li genyen konviksyon ke se sèlman lafwa nan Jezi Kri ak desizyon pou aksepte Li kòm Sovè ki reprezante solisyon pou pwoblèm lemond ap konfwonte.

Reveran Billy Graham (2èm, adwat) avèk 3 ansyen prezidan ameriken: Jimmy Carter (premye adwat), Bill Clinton (3èm) ak George H.W. Bush ou Bush Père (ekstrèm goch).

Reveran Graham te dirije kwazad nan tout rejyon sou planèt la, eksepte nan Antartik, swa an pèsòn, swa atravè satelit. Anvan ranvèsman sistèm kominis la, li te preche nan peyi ki te nan blòk sovyetik la; epi, pandan sezon Ivè 1994, li t al preche nan peyi Lachin ak Kore di Nò kote li te rankontre ak dirijan politik e relijye yo. Kòm rezilta deplasman sa yo nan lemond, Billy Graham te fin pa reyalize krisyanism nan se pa yon relijyon ki rezève totalman pou peyi oksidantal yo.

Daprè Franklin Graham, pititgason gran predikatè a, nan dènye mesaj papa li ki te pase sou video nan okazyon anivèsè nesans li, moun ka wè yon Billy Graham aje anpil k ap di: "Lèzetazini bezwen yon gran revèy espirityèl."

Foto sa a (yon piblikasyon La Mezon Blanch) montre ansyen Prezidan Barack Obama ki t ap rankontre Billy Graham, ki te genyen 91 lane, nan yon kay predikatè a te genyen nan Montreat, Kawolin di Nò., nan jounen dimanch 25 avril 2010. (Foto: AP/The White House, Pete Souza).

Reveran Graham sete yon gason bèl wotè; yon bo tip ki te genyen zye ble. Li te òdone Pastè Batis nan lane 1940. 10 zan apre sa, stil li kòm yon predikatè te deja ap vale teren tèlman li te popilè. Direktè medya William Randolph Hearst te pase yon magazin li te posede nan vil San Francisco ak lòt jounal li tap dirije, lòd pou yo te toujou fè repòtaj sou travay jenn evangelis Billy Graham. Jounalis yo te ba li ti non jwèt "Mitrayèt Bondye a."