Prezidan Joe Biden ak Prezidan La Chin Xi Jinping pral fè yon rankont o somè virtyèl semèn pwochèn nan moman 2 peyi yo ap eseye diminye tansyon ki egziste ant yo depi Biden monte o pouvwa a pi bonè ane sa a.
Televizyon leta Chinwa a, CCTV, deklare prezidan an pral fè yon rakont virtyèl ak tokay Ameriken ni Joe Biden Madi maten lè lokal kivledi Lendi swa lè peyi Etazini. Li ajoute ke 2 lidè yo pral "echanje opinyon sou relasyon Chinwa-Ameriken yo epi kestyon ki konsène 2 peyi yo."
Rankont la se pral 3èm fwa lidè yo pale depi mwad Fevriye a.
Li vini apre Lèzetazuni ak La Chin te pwomèt pandan rankont o somè Nasyonzini sou chanjman klimatik la nan Glasgow ann Ekòs, pou yo ogmante kowoperasyon yo pou akselere aksyon pou frennen gaz ki rann chanjman klimatik la pi sevè.
Se Biden ki te pwopoze rankont virtyèl la, apre li te pase anpil tan ak Xi lè yo tou le 2 te vis prezidan. Li te mansyone koze sa a pandan yon konvèsasyon yo te genyen nan telefòn nan mwad Septanm nan. Biden te di Xi li ta renmen gen opòtinite pou'l wè misye ankò, dapre sa Lamezonblanch fè konnen.
Xi poko janm kite La Chin depi pandemi kowonaviris la komanse.
Responsab Lamezonblanch yo te pwopoze yon rankont o somè virtyèl kom meyè fason pou 2 lidè yo genyen yon konvèsasyon sibstantif sou kestyon ki lakoz tansyon ki egziste nan relasyon ant 2 peyi yo.
"Nou espere Etazuni pral travay ansanm ak La Chin pou rann rankont o somè lidè yo yon siksè, epi remete relasyon Chinwa-Ameriken yo sou bon ray la pou ka gen bon jan devlopman," Ministè Afè Etranjè La Chinn deklare pa l'entèmedyè pòt pawòl li, Wang Wenbin.