Plizyè 100èn sitwayen pran lari yon lòt fwa ankò dimanch 16 jen 2019 la nan Pòtoprens, kapital peyi Dayiti a pou reklame demisyon Prezidan Jovenel Moïse. Dewoulman manifestasyon anti-gouvènman sa yo vin ogmante atravè peyi a depi apre piblikasyon rapò final Koudèkont la sou movèz jesyon lajan Petro Caribe a, yon fon peyi Venezuela te mete a dispozisyon Ayiti atravè yon pwogram petwòl pou rekonstriksyon apre tranblemanntè 12 janvye 2010 la ki te detui kapital ayisyèn nan Pòtoprens kote plis pase 200 mill moun te pèdi lavi yo ak anpil lòt te soti andikape ak lòt ankò sanzabri.
Koute temwayj kèk manifestan nan mikwo Matiado Vilmé:
Your browser doesn’t support HTML5
Ayiti: Manifestan yo Deklare, yo Pap Kite Lari a Tout Otan Prezidan Jovenel Moïse Pa Demisyone
Your browser doesn’t support HTML5
Ayiti: Manm Mouvman Sitwayen Revòlte Reklame Demisyon Prezidan Jovenel Moïse
Rapò Koudèkont lan lonje dwèt sou plizyè ansyen ak aktyèl wo fonksyonè leta, pami yo Prezidan Jovenel Moïse. Wikenn pase a, 2 mounn pou pipiti te pèdi lavi yo nan manifestasyon yo nan Pòtoprens dapre yon rapò pasyèl pòtpawòl lapolis la, Michel-Ange Louis-Jeune. Sepandan, youn nan pòt pawòl opozisyon radikal la Mèt Andre Michel pale de 7 mò dapre bilan pa li. Nan mitan semèn nan, yo anrejistre lòt viktim nan manifestasyon yo tou. Nan Okay yon moun mouri, plizyè lòt blese dapre korespondan VOA Kreyòl nan depatman Sid la, Jean Hernst Eliscar. Nan site endepandans la, Gonayiv tout aktivite te paralize akoz manifestasyon anti-gouvènman an. Nan Plato Santral ak kèk lòt depatman e kòmin ann Ayiti, manifestan yo boule kawotchou e bloke plizyè ri.
Prezidan Jovenel Moïse ki te anonse yon diskou alanasyon apre mach dimanch pase a te finalman deklare pandan selebrasyon fèt Lapolis la nan Akademi PNH la sou Wout Frè ke li pa nan koripsyon. Prezidan Jovenel Moïse di, " Prezidan pa nou an pa nan koripsyon e li pap janm nan koripsyon."
Your browser doesn’t support HTML5
Ayiti: Prezidan Jovenel Moïse Di Pwosè Petro Caribe a Ap Fèt Kanmèm
An repons ak diskou prezidan an, Petro Challengers yo pran lari pandan tout semèn nan kote yo kòmanse ak yon mouvman fè 7 tou Palè Nasyonal la pou kontinye reklame demisyon lidè PHTK a nan tèt peyi a. An plis desa, Senatè Youri Latortue ki se manm komisyon anti koripsyon Sena a deklare, " Se pa Prezidan Jovenel Moïse ki pou di li pa kowonpi. Se devan yon tribinal chèf leta a dwe fè deklarasyon sila a". Senatè Latortue ankouraje prezidan Gran Kò a, Carl Murat Cantave remèt rapò Petro Caribe a Bay lajistis. Yon reprezantan ekzektif la te di Lavwadlamerik rapò Koudèkont la gen fòs kote e ke li plis vize kreye nuizans politik pou chèf leta a.