Prezidan Sena ayisyen an senatè Carl Murat Cantave ranvwaye seyans prezantasyon enonse deklarasyon politik jeneral premye minis nome a Jean Michel Lapin pou yon dat ki poko fikse.
Biwo enstitisyon senatoryal la ap chache jwenn yon konpwomi politik ak 4 senatè opozisyon yo sou kesyon ki gen rapò ak prezidans sètèn komisyon pèmanant onivo gran kò a.
Aprè anpil déba ak entimidasyon senatè opozisyon yo te itilize kòm enstriman pou anpeche dewoulman nòmal seyans la. prezidan Sena a Carl Murat Cantave te oblije adopte yon rezolisyon pou konvoke yon konferans dè prezidan elaji pou lendi 13 Me 2019 la.
Mesye Cantave, yon lòt kote pale de sitiyasyon senatè Nawoom Marcellus k ap pran swen nan yon lopital apre li sanble ta santi yon malèz. Sa pa gen lontan Senatè Marcellus te soufri yon estrok kote li te oblije al pran swen aletranje. Mesye Cantave di senatè nan gran kò a gen pou panche sou ka kòleg yo Nawoom Marcellus.
Moun ki tap suiv deba a ke Televizyon Nasyonal tap retransmèt an dirèk, te ka wè Senatè Nawoom Marcellus yon fwa nan sal seyans lan nan moman senatè Lwès, Antonio Chéramy tap fè va e vyen pou anpeche seyans la dewoule.