Direksyon Polis Nasyonal la anonse fòmasyon yon komisyon pou panche yo sou revandikasyon polisye yo. Anons sa a fèt yon jou apre moun ki idantifye tèt yo kòm manm enstitisyon an manifeste, mete machin an kwa pou bloke lari a, sezi plizyè dizèn kle machin, mete dife nan lakou kabinè avoka mèt Samuel Madistin epi brile plizyè cha kanaval.
Polisye yo k ap mande prezans yon sendika nan enstitisyon an, mande reentegrasyon 5 kòlèg yo direksyon an revoke pami yo kowòdonatris sendika a Yannick Joseph ki se yon ajan 2.
Premye minis gouvènman demisyonè a, Jean Michel Lapin, nan yon koferans pou laprès madi 18 fevriye pase a te anonse yap travay pou satisfè demand polisye yo ap fè pou amelyore kondisyon travay yo.
Mesye Lapin te kondane konpòtman polisye ki tap manifeste, lendi 17 fevriye 2020 an. Lidè politik ak lòt enstans nan sosyete aysiyèn nan di yo kwè otorite dwe pran oserye revandikasyon polisye en menm tan tou egzòte manm PNH yo pou fè revandikayson yo pase nan ladisiplin olye de kraze brize.