Inyon Ewopeyèn mande otorite ayisyen yo pou mete sou pye yon gouvènman epi vote bidjè ane fiskal 2018- 2019 la. Inyon Ewòp la fè demand la apre konsta reprezantan enstitisyon an ann Ayiti fè pou l di yo peyi a gen 2 mwa depi li pa genyen yon gouvènman akoz palman an poko ratifye chwa yon nouvo premye minis.
Prezidan Sena a Carl Murat Cantave anonse sou rezo sosyal Twitter ke Sena a fikse dat 30 me 2019 la pou Premye Minis nome Jean Michel Lapin vin prezante politik jeneral li. Anons sa a fèt malgre 4 senatè opozisyon an poze kondisyon pou seyans ratifikasyon an kontinye apre 2 echèk.
Mesye Cantave nan yon deklarasyon li fè nan kòmansman semèn nan mande Prezidan Jovenel Moise pou l òganize yon rankont ak Sena a pou jwenn yon solisyon ak pwoblèm ki anpeche ratifikasyon Premye Minis nonmen a Jean Michel Lapin.