Minis ekonomi ak Finans la kòmanse yon seri chita pale ak komisyon finans chanm depite yo apre depo bidjè 2018-2019 la, yon bidjè ki deja pwovoke anpil kritik.
Bidjè 2018-2019 la evalye a 172 milya 825 mil goud. Dapre minis ekonomi ak finans la, Ronald Decembre, gouvènman Moïse/Céant fè yon apwòch pridan nan elaborasyon bidjè sila a ki reponn ak egzijan sosyo-ekonomik peyi a.
Selon minis la, apwòch pridan sa ap pèmèt tou plis kontwòl sou enflasyon an kote lajan ameriken ap vale teren pa rapò ak goud la kad pèdi plis valè. Sepandan, plizyè ekonomis kritike bidjè 2018-2019 la tankou ekonomis Eddy Labossiere ki fè konnen, o mwen gouvènman an te dwe prezante yon bidjè 200 milya good e san defisi akoz de jan sitiyasyon an ye nan peyi a.
Prezidan komite finans Sena a, Jean rigaud Belizaire, bò kote pa l, ankouraje gouvènman an al chache lajan kote li ye sou mache a pou ogmante resèt domestik yo. Dapre senatè a, leta dwe fè moun ki dwe l peye kòb yo dwe yon fason pou leta a kapab jwenn lajan pou l fonksyone.
Depite Abel Descollines di gouvènman an dwe bay garanti lap respekte alokasyon bidjè a fwa sa kòm sa dwa. Depite Descollines fè konnen palamantè yo nan chanm bas la kapab anpeche vòt bidjè a si gouvènman an pa bay ase eksplikasyon sou fason li pral aplike l.
Deba a ap kontinye sou nouvo lwa finans 2018-2019 la, kote an mèm tan tou, gouvènman an ap chache jwenn yon lòt akò ak Fon Monetè Entènasyonal, FMI, ki pral bay bayè de fon yo yon fevèr oubyen yon sinyal pozitif pou apiye bidjè 2018-2019 la ki bezwen anpil resous, tankou lajan pou òganize pwochen ekelsyon.