Ann Ayiti, Konsèy Elektoral Pwovizwa a (KEP) pibliye sou sit entènèt li rezilta definitif eleksyon prezidansyèl ki te dewoule nan dat 20 novanm 2016 la. Dapre rezilta sa yo, Jovenel Moise (PHTK) se Prezidan Eli ayisyen avèk 55,60% vwa yo. 3 kandida ki vini apre Misye Moise yo se:
- Jude Célestin : 19,57%;
- Jean-Charles Moise: 11,04%,
- Maryse Narcisse : 9,01%...
Rezilta definitif eleksyon prezidansyèl yo ann Ayiti. (Dat: 3 janvye 2017).
Rezilta sa yo te dwe paret nan jounen jedi 29 desanm 2016 la; men otorite elektotal yo te ranvwaye yo pou yo te bay BCEN nan (Biwo Kontansye Elektoral Nasyonal la) tan pou l egzamine e verifye pwosè vèbal yo, daprè demand kèk kandida kontestatè te fè. Pa egzanp, kandida Platfòm Pitit Dessalines nan, Moise Jean Charles, kandida LAPEH a, Jude Célestin, ak kandida Pati Fanmi Lavalas la, Maryse Narcisse, te denonse sa yo te konsidere kòm “fwòd ak iregilarite” ki ta genyen nan eleksyon prezidansyèl yo.
Nan kòmansman jounen madi 3 janvye 2017 la, mwens ke yon semèn apre jij yo nan BCEN nan te rejte demand kandida kontestatè yo –pou mank fondman-- yo te afiche desizyon yo pran sou dosye kontestasyon an: yo te di analiz yo fè sou 12 pou 100 pwosè vèbal yo pat montre te genyen fwod masif; men iregilarite yo dekouvri yo pa rive nan yon nivo pou yo ta gen konsekans sou rezilta definitif pwosesis la. Ak desizyon sa a, ki final, jij yo te mande Sant Tabilasyon an ekate 70 pwosè vèbal, kontabilize 8 lòt, epi rapouswiv ak dekont vòt yo.
Nan fen jounen 3 janvye a, KEP a te fè konnen otorite elektoral yo pa tap bay yon konferans pou laprès divès sektè tap tann; olye de sa, yo te envite piblik la an jeneral ak pati konsenè yo an patikilye ale sou sit entènèt KEP a pou yo jwenn rezilta definitif eleksyon prezidansyel yo.
Imedyatman apre rezilta final yo te parèt sou sit KEP a, Sèvis Kreyòl Lavwadlamerik la te pran kontak an direk ak korespondan nou ann Ayiti, Florence Lisené, ki te bay detay sou rezilta sa yo, reyaksyon yo te provoke ak sitiyasyon an nan Pòtoprens.
Your browser doesn’t support HTML5
Entèvyou Florence ak Jacquelin Bélizaire, Ronald César ak Lyonel Desmarattes sou rezilta definitif eleksyon prezidansyèl la ann Ayiti.
Klike sou lyen ki anlè liyn sa a pou w koute entèvyou Florence ak Jacquelin Bélizaire, Ronald César ak Lyonel Desmarattes.