Pandan 6 mwa ki pase depi patizan ak fanatik ansyen prezidan ameriken Donald Trump te eseye pran lokal Kongrè a daso pou yo te anpeche senatè yo ak depite yo sètifye viktwa kandida demokrat la, Joe Biden, nan eleksyon prezidansyèl novanm 2020 an, lidè repibliken yo nan Kongrè a pale pou di ensidan sa a, ki te dewoule nan dat 6 janvye pase a, pa gen tout karaktè serye e grav ke Demokrat yo vle ba li a. Repibliken yo pran pozisyon sa a menm aprè kèk polisye ki te la pou pwoteje batiman Kapitòl la jou jedi 6 janvye 2021 an fin fè depozisyon, madi 27 jiyè a, pou di sa k te rive nan premye semèn janvye a, pa gen lòt non ke “yon tantativ koudeta.” Se motamo pawòl youn nan ajan polis sa yo, Aquilino Gonell, ki fè konnen:
“Se yon tantativ koudeta ki te rive nan lokal Kongrè a jou sa a. Si sete yon lòt peyi, Lèzetazini t ap voye èd ba yo.”
Polisye Aquilino Gonell ki pat ka kenbe dlonanje li pandan l t ap fè depozisyon li nan jounen madi 27 jiyè 2021 an.
Misye Gonell -youn nan 4 polisye ki te patisipe nan premye jou seyans depozisyon ki te pwograme nan kad ankèt yon komisyon Chanm Bas la ap mennen sou afè a- te kontinye pou l di patizan ansyen Prezidan Trump yo te bat li byen bat e menm bagay la te rive yon kòlèg li, polisye Michael Fanone, manm depatman polis metwopolitèn Washinton nan, ki bay manm komisyon an detay sou sa k te rive li menm pèsonèlman:
<< Yo te rale m sòti pami polisye yo pou yo te trennen m nan mitan foul la. M tande yon moun di “mwen pran youn!” epi popilas la, ki t ap fè anpil vyolans, te rache badj mwen; yo te rache aparèy radyo kominikasyon mwen; yo pran minisyon mwen te kole byen di sou kò m epi yo te kòmanse vide koutpwen sou mwen. Yo bat mwen avèk sa m te santi kòm yon materyèl an metal di. >>
Sal kote premye jou seyans depozisyon an t ap devlope nan Kongrè a te chaje ak emosyon, li te chaje ak tansyon pandan komisyon dankèt la t ap tande premye temwen ki te konparèt pou prezante vèsyon yo sou sa k te rive nan jounen tristeman istorik sa a: li istorik pou tout move rezon, li istorik pou tout move koz.
Depite Bennie Thompson (D-Mississippi).
Sepandan, manm komisyon espesyal sa a, tankou depite demokrat Bennie Thompson, di pwosesis la pa fèt pou l gen paspouki ladan l; dapre li, li menm ak kòlèg li yo dwe montre yon konpòtman enpasyal.
“ Pa gen plis pou politik ni patizànri nan envestigasyon sa a. Sèl responsablite nou genyen se suiv prèv yo; se suiv evidans yo kèlkeswa kote yo va mennen nou.”
Sepandan, pi gwo repibliken nan Chanm Bas la, Kevin McCarthy, kritike byen kritike prezidan Lachanm nan, demokrat Nancy Pelosi, poutet li te pran desizyon wete 2 depite repibliken ke limenm, an tan ke lidè minorite a, te chwazi pou fè pati komisyon an. Misye McCarthy deklare:
Depite Kevin McCarthy (R-Kalifòni)., lidè minorite a nan Chanm Bas la.
“Sèl moun Prezidan Pelosi ap chwazi kòm manm yon komisyon se moun li konnen ki pral poze kssyon ke li vle yo poze. Konsa komisyon an tounen yon komisyon ki echwe nan misyon l e rapò l ap bay la se pral yon rapò fo mamit, yon magouy ki pa p merite konfyans pèsonn.”
Komisyon dankèt la -ki gen ladan l 7 Demokrat avèk 2 Repibliken ki brave refi ak defi lidè pati yo a pou yo rete kòm manm ekip palmantè k ap jere envestigasyon an- byen kapab genyen pou l voye manda bay kèk ansyen otorite wo plase nan La Mezon Blanch pou poze yo kesyon sou sa yo te konnen sou rezon ak kòz evennman tèrib sa a ki te debouche sou lanmò 7 moun. Daprè kèk sous ki pwòch Chanm Depite a, li posib pou seyans depozisyon yo kontinye rive jous nan fen ane 2021 an.