Konsèy Pèmanan l’OEA (Oganizasyon Eta Ameriken) te mete sou pye, nan jounen mèkredi 14 novanm 2017 la, yon sesyon pou manm yo te fè deba sou, antwòt, yon rapò CEPAL (Komisyon Ekonomik pou Amerik Latin nan) fèk prepare sou rejyon Amerik Latin nan ak Karayib la.
Rapò a ensiste sou nesesite pou peyi manm yo fè efò pou yo reyalize 3 objektif enpòtan pou chanjman pozitif fèt nan rejyon an: Devlopman, Entegrasyon ak Egalite. Reyalizasyon objektif sa yo se yon kondisyon endispansab pou Amerik Latin nan ak Karayib la fè fas avèk siksè ak yon sitiyasyon k ap vin pi konplike chak ane.
Rapò a atire atansyon sou yon lòt eleman ki kapab jwe yon wòl kle nan efò pou reyalize 3 objektif yo: se echanj komèsyal ant eta-manm yo, paske “komès dwe reprezante yon pati entegral yon politik endistriyèl e teknolojik.” Se poutèt sa sekretè egzekitif adjwen CEPAL la, Mario Cimoli, te deklare sa pa gen lontan: “Eta Manm yo dwe travay ansanm pou yo eksplore pèspektiv ki genyen pou lansman, relansman oubyen devlopman komès nan rejyon an.”
Katye Jeneral l'OEA nan Washington, DC.
Lòd di jou sesyon 14 novanm nan te genyen ladan l tou diskisyon sou rapò “Komisyon l’OEA pou Lit kont Koripsyon ak Enpinite nan Peyi Ondiras.” Otorite òganizasyon rejyonal la pwofite pou yo anonse pwochen “Fowòm Peyi Amerik Latin ak Karayib yo” pral dewoule ant le 22 ak le 26 avril 2019 nan vil Santyago, o Chili.