BERLIN - Nan yon gwo chanjman politik, gouvenman Alman an deklare Samdi li pral voye zam ak lòt pwovizyon dirèkteman bay Ikrèn e li apiye lide pou yo mete restriksyon sou aksè La Risi genyen ak sistem bankè global SWIFT la.
Chanselri Almay la anonse li pral voye 1,000 zan anti-tank ak 500 misil sòl-er "Stinger" bay Ikren "pi vit posib".
"Envazyon La Risi fe nan Ikren nan chanje tout bagay. Li menase lòd nan mond lan apre lagè a (Dezyem Gè Mondyal la)," Chanselye Alman Olaf Scholz deklare. "Nan sityasyon sa a nou gen obligasyon pou'n ede Ikrèn jan nou kapab pou'l defann tèt li kont lame anvayisè Vladimir Putin nan.
Met sou sa, minis ekonomi ak anviwonman Alman yo di peyi a pral kite Peyi Ba ekspedye 400 zam anti-tank ki fabrike ann Almay bay Ikrèn.
Pandan lontan, Almay te pousuiv politik pou li pa ekspòte zam fann fwa nan okenn zòn konfli, pami yo Ikrèn. Menm Vandredi, responsab gouvènman yo te di yo pral kontinye respekte politik sa a.
Peyi a fè fas ak kritik bò kote responsab Ikrenyen yo ak lòt alye yo poutèt yo di li pa aji ase vit pou ede Ikrèn defann tèt li kont envazyon Ris la. Anvan sa, Almay te kontribye 5,000 kaskèt pou defans Ikrèn.
Met sou sa, Almay deklare li pral voye 14 machin blende ak yon afè 10,000 tòn petwòl bay Ikrèn.