Òganizasyon Mondyal Lasante lanse yon apèl bay peyi afriken yo, jedi 2 jiyè a, pou l mande yo pran bon jan mezi prekosyon pou yo jere ogmantasyon kantite ka KOVID-19 la lakay yo nan moman peyi sa yo ap rekòmanse aktivite vwayaj ayeryen yo. Ekonomi afrikèn nan, ki repoze anpil-anpil sou vwayaj avèk tourism, sibi gwo dega anba pandemi kowonavris la. Doktè Matshidizo Moeti, direktè rejyonal OMS pou kontinan afriken an, pibliye nan jounen jedi a yon nòt pou laprès kote li deklare:
<< Vwayaj ayeryen se yon bagay ki vital, ki esansyèl pou sante ekonomik peyi afriken yo. Sepandan nan moman n ap kòmanse fè avyon yo vole ankò, nou dwe kontinye rete vijilan, rete veyatif. Sa nou rele “nouvo vi nòmal la” mande pou nou pran dispozisyon djyanm pou n kapab bloke pwopagasyon KOVID-19 la. >>
Òganizasyon Mondyal Lasante fè rekòmandasyon pou peyi afriken yo mete an aplikasyon yon pwogram tès pou moun k ap antre e k ap sòti nan peyi yo, pou yo kontinye oblije moun obsève distansyasyon sosyal la lè sa posib, ankouraje respè rekòmandasyon konsènan sa moun yo dwe fè lè y ap touse, kenbe yon rejis kote yo enskri non pasaje k ap antre yo epi kontinye swiv yo pandan otorite yo ap siveye de prè evolisyon kowonaviris la sou kontinan afriken an.