Omwen 32 moun mouri nan 2 rasanbleman ki te fèt pandan distribisyon manje samdi nan Nijerya, nan yon moman kote peyi a ap fè fas ak youn nan pi gwo kriz ekonomik, ki lakoz yon gwo enflasyon nan pri manje yo.
Nan Okija, nan eta Anambra (sid Nijerya), bilan lapolis la te anonse dimanch lan te rive nan 22 moun mouri. Otorite lokal yo te fè konnen samdi "plizyè moun" te mouri pandan ensidan an.
"Komandman polis la, pandan l ap eksprime kondoleyans li bay fanmi ak zanmi moun ki mouri yo, swete yon bon retablisman ak moun ki blese yo," se sa Tochukwu Ikenga, pòtpawòl polis eta Anambra, te deklare dimanch.
Yon ankèt te louvri pou detèmine sikonstans presi ki lakòz bouskilad sa, dapre lapolis.
Samdi tou, nan Abuja, kapital Nijerya, 10 moun te mouri ak 8 lòt blese pandan yon lòt bouskilad. Sa te pase tou pre legliz katolik Maitama a, pandan yon distribisyon manje ki te fèt pou "moun vilnerab ak granmoun aje," selon fòs lòd yo.