Lopital Medsen San Fwontyè (MSF) anonse, mèkredi 11 novanm nan, nan yon kominike pou laprès, y ap reprann yon pati nan aktivite yo nan kapital la.
Malgre desizyon sa a, MSF di yo pa ko tounen transpòte okenn malad paske toujou gen gwo ris pou sekirite ekip yo ak pasyan yo. Se sa ki eksplike, daprè kominike a, yon sant tankou sant ijans Tijo a ki chita sou transfè malad yo, soti nan yon lopital ale nan yon lòt, poko relouvri li menm.
Toutfwa sikisal yo nan Site Solèy, Taba, Kafou ak klinik « Pran men m » ap fonksyone.
Desizyon sa a vini 22 jou aprè responsab yo te deside kanpe travay lakoz menas ak ka vyolans ki te vize pèsonèl ak pasyan yo. Men tou aprè yon dyalòg « konstriktif » ak otorite yo pou garanti respè ekip la ak misyon òganis lan.