"Hello" se videyo tou nèf Fatima a ki ap byen mache sou rezo yo.
Yon pwodui kote atis la, non sèlman livre kè l, men tou nan videyo sa, aktè ameriken an Robert Richardson reponn apèl chantez ayisyèn nan.
Sipriz: Nan yon dekò, chantez Fatima, abiye kou pan (kòsaj blan, jip wouj ak bòt wouj, lanse yon apèl solanel ak tout moun ki sou sa pou vin pran ti kè l.
Antouka se prensipal sijè atis la abòde nan nouvo mizik li an ki gen pou tit "Hello" ki twouve l sou nouvo albòm li an "Pwoteje m".
Fatima chante: "Hello kote ou ye ? Tande bri ti kè m k ap chache ou. Hello kote ou ye ? Kè mwen pran twòp tan pou l retwouve ou".
Yon tèks ki tradui santiman ak emosyon chantez la ki di l pran "twòp kou", li "bouke kriye".
Toutfwa, sa pa anpeche l kontinye espere jwenn moun pa l lan.
Moun ki reponn apèl Fatima a se Aktè ameriken an ki jwe nan yon pakèt fim ak seri, tankou Vampire diaries, Empire Chocolate City elatriye...
Videyo a disponib depi lendi sou platefòm YouTube.
Li preske gen 200 mil views nan 16è tan apre piblikasyon l.