Doktè Laroche pran egzanp 4 fanm ki te vin fè sezaryèn nan yon lopital li pa t site non ki mouri ak tout bebe yo nan vant yo paske ni jinekològ ni anestezis pa t ka vini lakoz katye yo te bloke.
« Nou wè yo ka prale ak ti bebe a nan vant yo. Okenn chirijyen, okenn anestezis pa kab deplase… Yo mouri », daprè enfòmasyon Ronald Laroche pataje nan emisyon an.
M. Laroche te rapousib pou l di okenn sant piblik ki kapab resevwa fanm ansent nan peyi a p ap fonksyone.
« Peyi a pa gen okenn matènite piblik. Sèl matènite piblik yo te konn genyen se Chansrèl. Ebyen depi plizyè mwa Chansrèl tonbe, pa gen okenn kote yon fanm ansent kapab akouche.
Soti depi Furcy rive jis anba Lavil, pa g okenn kote pou fanm ansent akouche », presizyon doktè Laroche ki pwofite raple tou jan sistèm sante a ap trepase paske ensekirite a pa sispann vale teren nan peyi a.