" Mwen prefere tann pou Lula obsève, pou l byen enfòme sou evènman yo, kòm chèf leta, pou l di sa li gen pou l di," se sa Maduro te deklare pandan emisyon li ki fèt chak semèn sou televizyon piblik la.
Karakas, ki nan yon kriz ekonomik san bout, ki vin pi mal akòz sanksyon ameriken yo, te swete antre nan Brics pandan somè ki te fèt nan Kazan (Larisi) semenn pase a. Malgre sipò Ris, li te jwenn veto Brazilia.
Maduro te evite akize Lula dirèkteman sou veto a, li pito atake ministè afè etranjè Brezil la.
"Itamaraty (palè ki abrite ministè afè etranjè a nan Brazilia) se yon pouvwa anndan pouvwa Brezilyen an depi anpil ane (...) ki toujou fè konplo kont Venezyela," li te kontinye pou l di.
"Se yon ministè (...) ki gen lyen sere ak Depatman Deta ameriken an depi nan epòk koudeta kont (prezidan brezilyen) Joao Goulart an 1964," li te ajoute.
Lula, alye depi lontan Maduro ak predesesè li, defen Hugo Chavez (1999-2013), te pran distans ak dirijan Venezyelyen an depi reyeleksyon li ki konteste, 28 jiyè a. Opòzisyon an, ki rele pou magouy ap revendike viktwa yo.
Karakas te reyaji fò parapò ak veto brezilyen an vandredi nan yon kominike san tete lang: "agresif," "ostil," "ineksplikab ak imoral." Veto a se konsekans yon "konfyans ki briza," selon konseye Lula a, Celso Amorim, ki te soulinye Maduro te pwomèt Lula pou l pibliye pwosesis vòt yo nan eleksyon prezidansyèl la.
Konsèy nasyonal elektoral la ki te pwoklame Maduro kòm gayan poko janm pibliye yo toujou, yo te deklare yo viktim pirataj enfòmatik.
Samdi, pwokirè jeneral Venezyela, Tarek William Saab, te akize kòmkwa Lula kache dèyè aksidan domestik li te viktim nan kòm yon "pretèks" pou evite patisipe nan somè a.