Manifestan anfavè Palestinyan pran kontwol yon bilding nan Inivèsite Columbia nan New York bonè jodi madi a, kote yo mete barikad devan antre kanpis la e deplwaye yon drapo palestinyen nan yon fenèt, se dènye eskalasyon ki fèt nan manifestasyon kont lagè Izrayèl-Hamas la, ki gaye nan kanpis inivèsite nan tout peyi a.
Video moutre manifestan sou kanpis Columbia nan Manhattan ki kenbe men devan Bilding Hamilton bonè jodi madi a e ki ap pote mèb ak barikad an metal ale devan bilding nan, ki se youn pami tout lòt ke manifestan te okipe sou kanpis la nan batay pou dwa sivik an 1968, ak nan manifestasyon kont Lagè Vyetnam nan. Mesaj ke òganizatè mouvman sa a yo poste sou yon paj Instagram yon ti tan apre apre minwi, mande moun pwoteje kan an epi jwenn ak yo nan Bilding Hamilton Hall la.
Estasyon radio etidyan, WKCR-FM pase yon repòtaj pwen pa pwen ki moutre jan yo pran kontwol bilding nan – prèske 12 èdtan apre dèle lendi 2 zè apremidi pou manifestan yo te kite yon kan ki te gen apeprè 120 tant, osnon inivèsite a ta pwal sispann etidyan sa yo.