Sena Etazini an rejte tout akizasyon ki ta ka mennen nan destitisyon Sekretè Sekirite Enteryè Alejandro Mayorcas, kote yo mete fen nan efò Repibliken yo nan Chanm Depite a pou chavire minis la pou jan li jere fwontyè Etazini-Meksik la.
2 vòt yo mete fen nan jijman an anvan diskisyon yo te tanmen. Senatè yo te vote apa pou rejte chak nan 2 atik destitisyon yo ki, dapre yo, pa ann akò ak konstitisyon an.
Vòt pou 2 atik yo soti 51 kont 48 ak 51 kont 49, e senatè yo te vote selon liy pati politik pa yo.
Premye atik la akize Mayorcas kòmkwa “li te deside tabli yon sistèm kote li refize aplike lwa sou fwontyè a. » 2èm atik-la akize Mayorcas kòmkwa li “vyole konfyans » yo lè li di ke fwontyè a gen sekirite.