Minis Afè Etranjè Iran an inogire nouvo konsila peyi a nan kapital Siri a Damas, ayè lendi a, yon semenn apre yon frap aeryen kote li akize Izrayèl, ki te detwi ansyen enstalasyon yo, sa ki voye tansyon moute nan rejyon an.
Teheran, ki se yon alye Damas, sèmante pou li vanje frap aeryen ki te fèt lendi pase sou seksyon konsilè nan anbasad Iran an, ki te touye 7 manm Kò Revolisyonè Islamik la, pami yo 2 jeneral.
Frap la fèt pandan gen yon gè ki ap dewoule ant Izrael ak Hamas, ki te tanmen apre gwoup militan Palestinyen ke Iran apiye a te lanse yon atak ki pa te janm fèt anvan sou Izrael 7 Oktob pase.
Damas ak Teheran akize Izrayèl pou frap lendi pase a, men Izrayèl pa pale sou kesyon an.
Minis Afè Etranjè Iran Hossein Amir-Abdollahian inogire nouvo seksyon konsilè a nan Damas an prezans tokay siryen li Faisal Mekdad, dapre ajans nouvèl siryen SANA.