Operasyon an se dènye siy ki moutre latwoublay ann Ayiti nan moman vyolans gang menase pou jete gouvènman an e pouse dè milye moun kouri kite kay yo.
“Transpò pèsonèl pou ale nan anbasad-la e pou pran Ameriken ki ap kite l, fèt ann akò ak pratik etabli pou ogmante sekirite nan anbasad Etazini toupatou nan mond la, e pa te gen okenn Ayisyen abò avyon militè a,” se sa Kòmandman Sid lame Etazini an di nan yon kominike.
Ayiti te antre nan yon eta dijans dimanch pase apre batay te pete pandan Premye-minis Ariel Henry te nan Nairobi kote li t ap chache yon antant pou misyon ke l-ONU apiye a e ke yo ap retade depi kèk tan.
Yon lòt kote, Sekretè Deta Etazini Antony Blinken ale Jamayik jodi lendi a pou mete ansanm ak lidè Karayib yo nan diskisyon sou yon solisyon pou vyolans politik ki ap ravaje Ayiti ak èd imanitè pou pèp ayisyen an.
Kominote Karayib la (CARICOM), yon alyans nasyon karayib, di chita-koze yo ap santre sou sekirite ki ap establize Ayiti e sou efò pou reponn bezwen imanitè ijan nan peyi a.