Medikaman pwal jwenn otaj ki anba men Hamas nan Gaza jodi mèkredi a, nan kad yon antant ke LaFrans te jwenn ak Katar.
LaFrans di medikaman yo se pou 45 otaj ki gen maladi kwonik, kidonk maladi ki p ap janm trete, e ke livrezon an pwal fèt ak èd LaKwa Wouj Entènasyonal.
Katar di antant la gen ladann tou remèd ak lòt èd imanitè pou sivil palestinyen nan Gaza.
Militan Hamas te pran kòm otaj yon afè 240 moun nan atak 7 Oktob pase a sou Izrayèl, kote yo te touye tou apeprè mil-200 moun, dapre chif ke Izrael te bay. Izrayèl te tanmen kanpay militè li a pou efase Hamas apre atak la.
Hamas te lage plis pase 100 otaj nan yon kanpo tanporè nan mwa Novanm pase, men ka gen apeprè 130 lòt ki rete anba men Hamas nan Gaza.