Otorite imigrasyon Etazini rapòte jedi yon gwo ogmantasyon nan kantite moun ki ap janbe fwontyè Etazini-Meksik la, sitou nan zòn tankou Eagle Pass nan eta Texas, kote majistra bouk la lanse yon eta dijans.
Ajan Gad Fwontyè Etazini bare 9-mil migran sou tout fwontyè a nan yon peryòd 24 è, dapre nouvèl ki parèt nan laprès mèkredi a. Ogmantasyon nan arive migran yo nan Eagle Pass fè gwo twou vid nan resous lokal yo e depase kapasite enstalasyon pou resevwa yo ki te deja chaje.
Mèkredi swa, ant 500 ak 800 migran, pifò nan yo moun Venezuela, t ap tann pou responsab Patwouy Fwontyè yo anrejistre yo, anba Pon Entènasyonal Eagle Pass-Piedras Negras, youn nan 2 pon ki nan Eagle Pass. Yon responsab Ladwàn ak Pwoteksyon Fwontyè, ki gen ti non ann angle CBP, di LaVwadlamerik CBP sispann pasaj nan Eagle Pass pou li ka jere migran ki janbe fwontyè a nan kèk jou ki pase yo. Men li di yo voye trafik la sou yon lòt pon nan menm zòn nan.