Yon tribinal nan Moskou refize tande madi yon apèl ke repòtè jounal Wall Street Evan Gershkovich te mande kont yon desizyon ki vle pou li pase 3 mwa anplis anba kòd ann atandan jijman, dapre media leta ris.
Gershkovich anba kòd depi arestasyon-li nan mwa Mas anba akizasyon espyonaj, sa ke li-menm ak gouvènman ameriken an demanti ak fòs. Gouvènman ameriken an di jounalis-la fèmen nan prizon san rezon.
Desizyon tribinal la se dènye bak ki fèt nan batay legal pou repòtè a, ki jwenn yo pwolonje tan li anba kòd ann atandan jijman 2 fwa – premye a sete nan mwa Me.
Pwiske yo rejete apèl li a, li pwal oblije rete anba kòd jiska 30 Novanm oswa pita.
Okenn dat pako fikse pou jijman li. Gershkovich pèdi 2 apèl deja kont desizyon pou kenbe li nan prizon pou tann jijman. Gwoup-yo ki ap defann libète laprès kondane dènye desizyon tribinal la.