Pyongyang ap mennen ankèt sou solda a pou sa li rele “antre ilegal” nan Kore di Nò, se sa ajans nouvèl KCNA di jodi mèkredi a. Li ajoute ke King avwe ke sa k te pouse l fè sa, se “move tretman inimen ak diskriminasyon rasyal ke li t ap sibi nan Lame Etazini an.”
Ajans la di ke solda 23 lane a te eksprime dezi pou li chache refij nan Kore di Nò oswa nan yon 3èm peyi, e di li te “mal konprann” inegalite ki nan sosyete ameriken an.
Li ta pwal deyò nan lame a lè li ta retounen nan baz li nan Fort Bliss nan eta Texas 17 Jiyè pase, apre li te fin pran prizon nan Kore di Sid anba akizasyon pou vwadfè.
Li te gen pou l pran avyon pou tounen Etazini 17 Jiyè, men te degaje l antre kò l nan yon gwoup touris sivil ki ta pwal vizite enstalasyon fwontyè a, nan jou apre a.