Pokrovsk chita nan rejyon Donetsk, ke LaRisi te antre anba drapo li, kote kèk nan pi move batay yo dewoule depi LaRisi te lanse envazyon li a an Fevriye 2022. Pavlo Kyrylenko, ki se gouvènè Donetsk, di 2 misil frape nan apeprè 40 minit youn apre lòt, detwi bilding kote moun rete, restoran, magazen ak bilding administratif, ak yon otèl kote jounalis etranje renmen desann.
Pami mò yo, gen yon responsab sèvis sekou nan gouvènman rejyonal Donetsk la. 25 moun pou pi piti blese nan atak marasa yo.
Pandanstan, 2 moun pèdi lavi anba atak misil ris nan vilaj Kruhliakivka nan distri Kupiansk, dapre Andriy Yemak, ki se chef administrasyon prezidansyèl nan Ikrèn.
Yon lòt kote, Etazini kalifye kòm enpòtan patisipasyon LaChin nan some lapè sou Ikrèn ki sot dewoule nan vil Jeddah nan Arabi Saoudit nan wikenn pase a.
42 peyi te patisipe nan somè a ki te dire 2 jou. Yo pa te envite LaRisi nan chita-koze wo nivo sa yo.