Kore di Nò lanse 2 misil balistik ki pa tire lwen nan lanmè alès bò kote li, se sa lame Kore di Sid la di madi, kidonk Nò a ajoute misil sa yo sou tou sa li tire deja nan sa ki sanble pwotestasyon kont Etazini ki voye gwo ekipman nan lanmè Kore di Sid pou moutre fòs li.
Nan 3èm seri lansman li depi semèn pase, Kore di Nò tire misil yo yon ti tan anvan minwi etan nan yon zonn toupre kapital la Pyongyang, dapre eta majò lame Kore di Sid la. Li di misil yo te vwayaje nan distans apeprè 400 kilomèt anvan yo te tonbe nan dlo bò kot lès penensil Kore a.
Nan yon kominike, lame Kore di Sid la kalifye lansman Kore di Nò a yo kòm yon "pwovokasyon grav" ki menase lapè ak estabilite nan rejyon an.
Lansman sa yo fèt kèk èd-tan apre lamarin Kore di Sid te anonse ke yon soumaren ameriken ki mache ak enèji nikleyè – USS Annapolis – rive nan yon pò nan zile Jeju. Aksyon sa a moutre efò pou ekspoze pi klè ekipman estratejik Etazini nan rejyon an pou kraponnen Nò a.