Avyasyon militè Ikrèn nan di lame a desann 37 sou 63 misil ak dron ke LaRisi te lanse nan tout peyi a, e ke sa yo te plis vize sete enfrastrikti ak enstalasyon militè nan zòn Odesa.
Pò yo nan Odesa te sèvi pou ekspòte sereyal nan kad yon akò ki te dire preske yon lane anvan LaRisi te anonse ke li p ap patisipe ankò ladann, semèn sa a.
Prezidan Ikrèn, Volodymyr Zelenskyy, di mèkredi dènye atak LaRisi a “te vize enfrastrikti ki nan akò sereyal la, e ke chak misil ris se yon kou pa sèlman pou Ikrèn, men pou tout mond la ki vle viv nòmal ak nan sekirite.”
Oleh Kiper, ki se gouvènè rejyon Odesa a, di atak la te pwisan e li ekzòte moun yo pou yo rete nan abri.
Serhii Popko, ki se chef administrasyon militè vil Kyèv, di sou Telegram ke sistèm defans aeryen yo bloke tout dron ki te vize Kyèv e ke pa gen okenn nouvèl touswit ki rapòte dega.