Majistra Lviv Andriy Sadovyi di misil la donmaje tou apeprè 60 apatman ak 50 machin. Sadovyi di se pi gwo atak ki fèt sou enfrastrikti vil la depi envazyon LaRisi nan Ikrèn nan te tanmen ane pase.
Prezidan Ikrèn Volodymyr Zelenskyy di pwal gen yon repons kòmsadwa pou lènmi an.
Lviv se yon vil ki toupre fwontyè Ikrèn ak Polòy, lwen liy konba yo ki nan lès ak sid Ikrèn kote anpil batay sot dewoule ant fòs Ikrèn ak ris.
Nan yon entèvyou ak chèn televizyon CNN ki pase mèkredi, Zelenskyy di li te vle yon kont-ofansiv pi bonè, men ke li pat ka fè li anvan li te resevwa èd militè Etazini ak patnè li yo ann Ewòp.
Ikrèn te lanse kont-ofansiv la mwa pase ak objektif pou repran teritwa ki anba kontwòl LaRisi depi envazyon ris la te tanmen an Fevriye 2022.
Yon lòt kote, Prezidan Byelorisi an di lidè mèsenè ki te dirije yon rebelyon tou kout kont Kremlin an retounen nan Larisi e ke twoup Wagner li yo rete nan kan yo.
Ajans nouvèl Associated Press pat ka jwenn sous endepandan pou verifye enfòmasyon Prezidan Alexander Lukashenko a, e Kremlin an refize di ki kote Yevgeny Prigozhin ye.
Semèn pase a, Lukashenko te di ke lidè mèsenè a te travèse nan Byelorisi.