Etazini dwe jwenn mwayen “ekziste pasifikman” ansanm ak LaChin pandan yo nan gwo konpetisyon, se pawòl Sekretè Deta Antony Blinken mèkredi, kote li fè wè ke Washington pa ap chache detache li ak Peken nan kesyon “ekonomi” e ke komès ant 2 peyi yo te moute nan yon nivo rekò ane pase.
“LaChin pa pwal kite nou. Nou pa pwal kite LaChin,” se sa Blinken di nan yon reyinyon nan New York, yon aktivite ki te fèt anba lobedyans Konsèy sou Relasyon Etranje.
Kèk jou apre Blinken te fin rankontre ak otorite chinwa yo nan Peken, li te deklare relasyon Etazini ak LaChin se yon “konpetisyon pou lontan” san pa gen yon liy klè kote yo chak ap goumen pou rive an premye.
Nan moman Etazini ap konsidere mwayen pou limite lajan ak teknoloji ameriken ki pwale an Chin pou rezon sekirite, prensipal diplomat Etazini an di, “Nou vle asire ke nan konpetisyon sa a, nou kanpe nan yon pozisyon solid” e ke se nou ki ka òganize sa ki pwal fèt nan chak sityasyon.”