Ministe Afè Etranje Kanada a anonse sanksyon kont 3 lòt Ayisyen pou vyolasyon dwa moun ak vyolans seksyèl. Ayisyen sa yo se: biznisman Andre Apaid ak chèf gang Lanmò Sanjou Vitel'Homme Innocent ak Johnson Andre.
Yon kominike pou laprès Ministe a pibliye di sanksyon sa yo mete entediksyon kont moun sa yo ki anpeche yo patisipe nan okenn tranzaksyon finansye ak peyi a epi bloke tout byen yo genyen Kanada. Met sou sa li di gen posibilite pou yo arete yo si yo eseye vwayaje Kanada. Kanada di 3 moun sa yo pa gen dwa met pye yo sou teritwa Kanadyen.
Madan Joly fèk sot vizite Washington, kote li te asiste asanble jeneral Oganizasyon Eta Ameriken yo.
Nan yon mesaj li pibliye sou kont ofisyèl Twitter li, Joly di li te rankontre ak tokay Ayisyen li Jean Victor Geneus, kote yo te diskite sou asistans pou polis nasyonal la.
Madan Joly di Kanada bay Ayiti $100 milyon asistans sa pa gen lontan pou apiye travay gouvènman Ayisyen an ap fè epi pou ranfòse enfrastrikti polis nasyonal la.
Pandan diskou li devan l OEA, Madan Joly souliyen nesesite pou yon kolaborasyon miltilateral konsete epi jefò pou pwoteje dwa moun kap viv an Ayiti ak Nikaragua.