Sekretè Deta Ameriken Antony Blinken anonse Mèkredi 21 Jen ke Etazini pral voye 1.3 milya dola èd anplis bay Ikrèn pou ede peyi a ki pran anpil frap nan konfli a repare rezo enèji li yo ak pou ede li modènize pò li yo, ray tren li ak lòt enfrastrikti.
Nan kantite lajan sa a, 520 milyon dola prale nan ede Ikrèn repare rezo enèji li yo, 657 milyon dola pral ede modènize pasaj fwontyè li yo, pò yo, liy tren yo ak lòt enfrastrikti enpòtan.
Sekretè Deta a avèti ke Larisi ka gen pou kontribye nan rekonstriksyon Ikrèn.
Minis afè etranjè alman, Annalena Baerboc, ensiste sou nesesite pou konekte reparasyon Ikrèn apre lagè a ak pwosesis pou Kyiv rantre nan Inyon Ewopeyen an.
Baerbock di tou ke Almay pran angajman pou ajoute 381 milyon ewo sou èd ke li bay Ikrèn pou asistans imanitè ane sa a.
Minis afè etranjè fransè Catherine Colonna di Lafrans ap bay yon valè 40 milyon ewo ($44 milyon dola) pou finanse rekonstriksyon ijan nan enfrastrikti ak ekipman sante ki enpòtan anpil pou peyi a.