PRISTINA, Kosovo (AP) — Òganizasyon Trete Nò Atlantik pral voye 700 sòlda anplis nan nò Kosovo pou ede kwape manifestasyon vyolan apre lese-frape ak Sèb ki te lakoz 30 sòlda entènasyonal blese.
Sekretè Jeneral Òganizasyon Trete Nò Atlantik, Jens Stoltenberg, fè anons la apre chita pale nan Oslo, kapital peyi Nòvèj, ak premye minis peyi a, kote li di ke ap gen tou yon batayon rezèv anplis ki ap rete ann alèt si an ka yo ta bezwen plis ranfò.
Pou kounye a misyon lapè Òganizasyon Trete Nò Atlantik la ke yo rele KFOR gen ladann apreprè 3,800 sòlda.
Ayè madi a, gadyen lapè miltinasyonal KFOR yo te itilize kloti an metal ak baryè fil fè pou ranfòse pozisyon yo nan yon vil nan nò a kote sitiyasyon an kòmanse mabyal.