Lamarin peyi Iran sezi jedi nan Gòlf Oman an yon bato petwolye ki gen drapo zile Marshall yo pandan gen plis tansyon sou pwogram nikleyè Teheran an, e se dènye bato konsa ke Iran sezi nan yon wout dlo ki enpòtan anpil pou peyi nan mond la transpòte materyèl pou enèji.
5èm Flòt Lamarin Etazini an ki base nan Mwayenn Oryan an te idantifye bato a kòm Advantage Sweet. Satelit MarineTraffic.com ki te swiv bato a te moutre li nan Gòlf Oman, o nò capital Oman an, Muscat, jedi apremidi. Li te fèk soti Koweit e gen papye ki di destinasyon li se Houston, Texas.
Advatage Sweet te lanse yon siyal detrès a 1:15 apremidi nan lè zòn nan nan dlo entènasyonal lè Iran te sezi li, se sa Lamarin Etazini di.
“Iran aji kont lalwa entènasyonal e li ap deranje sekirite ak estabilite rejyon an,” se sa 5èm Flòt la di nan yon deklarasyon. E li ajoute, “Iran ta dwe libere bato a imedyatman.”